Digital Qazaqstan 2026 халықаралық цифрлық форумы аясында Шымкент қаласында Central Asia Programming Championship 2026 спорттық бағдарламалау чемпионаты өтті. Жарысқа Қазақстан, Қырғызстан, Өзбекстан, Тәжікстан және Түрікменстаннан келген 20 жастан асқан ең мықты қатысушылар жиналды. Олар 3 млн теңге жүлде қоры үшін және халықаралық сарапшылар алдында өздерін көрсету мүмкіндігі үшін бақ сынады. Халықаралық жарыс қатысушыларға алгоритмдік және аналитикалық қабілеттерін әлемдік деңгейдегі тапсырмалар арқылы көрсетуге мүмкіндік берді. Чемпионат ICPC форматында өтті. 28 ақпанда өткен онлайн іріктеуден кейін финал офлайн форматта ұйымдастырылып, аймақтың үздік бағдарламашылары шешуші кезеңде бір жерде бас қосты. Финал қорытындысы бойынша:1-орынды Фарход Хакимйон (Тәжікстан), 2-орынды Айбар Куанышбай (Қазақстан),ал3-орынды Альтаир Ашуров (Қазақстан)иеленді. Жалпы 3 млн теңге жүлде қоры былай бөлінді: 1-орынға 1,5 млн теңге, 2-орынға 1 млн теңге және 3-орынға 500 мың теңге берілді. «Осындай жоғары деңгейдегі жарыста өз білімімді көрсетіп, көрші елдердің үздік бағдарламашыларымен танысқаныма қуаныштымын. Бұл чемпионат мені әрі қарай дамуға және алған білімімді нақты жобаларда қолдануға шабыттандырады»,– дедіжеңімпаз Фарход Хакимйон. Биыл чемпионатта сарапшылар құрамына да ерекше көңіл бөлінді. Финалда халықаралық IT компаниялардың өкілдері қатысты. Олардың қатарында Meta компаниясының аға әзірлеушісіБахытжан Байжикенов,AGI Lab және Khan Group компанияларының бас директорыЖомарт Садыков, Higgsfield AI VP of TalentДалида Еркулиева,Google компаниясының аға әзірлеушісіАман Утемуратов,Booking платформасының әзірлеушісіНәрікби Мақсұтжәне TON Core өкіліАлександр Кирсановболды. Сарапшылар қатысушылардың шешімдерін бағалап, тәжірибесімен бөлісіп, халықаралық компанияларда мансап зақұру бойынша кеңес берді. «Central Asia Programming Championship қатысушылардың дайындық деңгейі өте жоғары екенін көрсетті. Бұл жарыс аймақтың үздік IT мамандары үшін тәжірибе алмасуға жақсы мүмкіндік болды», – дедіAlem.ai Foundation директоры Адина Магавина. Ұйымдастырушылардың айтуынша, чемпионат тек зияткерлік жарыс қана емес, сонымен қатар аймақтық IT қауымдастығын дамытуға арналған тиімді алаң болды. Қатысушылар өз деңгейін сынап, халықаралық компаниялардың назарын аударып, болашақта жұмысқа орналасуға немесе ірі жобаларға қатысуға мүмкіндік беретін байланыстар орнатты. Чемпионатты Alem.ai Foundation, Қазақстанның спорттық бағдарламалау федерациясы және Astana Hub халықаралық инновациялық кластеріұйымдастырды. Жоба Higgsfield.ai және AGI Lab қолдауымен өтті. Айта кетерлігі, Digital Qazaqstan 2026 форумы серіктестер мен демеушілердің қолдауының нәтижесінде ұйымдастырылды. Барлық шығын демеушілер есебінен жабылды. Форумның бас серіктесі Freedom Bank– жеке және корпоративтік клиенттерге қызмет көрсететін қазақстандық цифрлық банк, Freedom Holding Corp. құрамына кіреді. Банк Қазақстанда алғаш болып ипотека, автонесие және бизнес несиелерін толық цифрландырды, сондай-ақ елдегі алғашқы INVEST CARD инвестор картасын ұсынды. Платиналық серіктес Alageum Electric– электр энергетикасы, машина жасау және инфрақұрылымдық құрылыс салаларында жұмыс істейтін, 30-дан астам кәсіпорынды біріктіретін ірі электротехникалық компаниялар тобы.

«Астана Опера» театрының Үлкен залында қазақстандық хореограф, театр солисі Сұлтанбек Ғұмардың «Мәңгіліктің төрт сыры» балетінің премьерасы өтті. Осылайша, елордалық театр репертуары жаңа қойылыммен толықты. Спектакльдің өзегіне адам өміріндегі басты рухани құндылықтардың бірі – махаббат тақырыбы арқау болған. Көркем сахналық тіл арқылы қойылым адамдар арасындағы өзара құрмет, түсіністік пен ішкі кемелдікті терең бейнелейді. «Мәңгіліктің төрт сыры» – Сұлтанбек Ғұмардың алғашқы бір актілі спектаклі. Балеттің эмоциялық әрі философиялық тереңдігін ұлттық әуендерді заманауи классикалық үнмен үйлестірген композитор Хамит Шанғалиевтің музыкасы айқындай түседі. Театрдың симфониялық оркестрі мен хоры «Құрмет» орденінің кавалері Руслан Баймурзиннің дирижерлігімен өнер көрсетті.

Семсерлесуден Ұлттық құрама спортшысы Руслан Курбанов Астана қаласында өтіп жатқан әлем кубогының 1/4 айналымында қарсыласын жеңді. Отандасымыз жартылай финал жолдамасын Париж Олимпиадасының 2 дүркін чемпионы (жекелей және командалық сайыста), әлем чемпионы Коки Каномен сарапқа салды. Бұл айқас 9:8 есебімен аяқталды. Енді Руслан келесі жекпе-жекте Мажарстан өкілі Давид Надьпен күш сынасады. Айта кетейік, бүгін кешке сапы бағдарламасында ерлер мен әйелдер арасындағы жүлдегерлер белгілі болады. Ал ертең шешуші жарыс күні командалық сайыс өтеді.

СҚО-да кибералаяқтық құрбандарына 500 млн теңгеден астам қаражат қайтарылды. Солтүстік Қазақстан облысы полиция департаментінің бастығы Абай Жүсіпов халық алдында есептік кездесу өткізді. Кездесу барысында өңірдегі жедел ахуалдың тұрақты екені атап өтілді. Соңғы он жыл ішінде облыстағы қылмыс деңгейі шамамен 3,5 есеге төмендеген. Атап айтқанда, тіркелген құқық бұзушылықтар саны 10 103-тен 2 909 дерекке дейін азайған. Ал өткен бір жылдың өзінде қылмыс көрсеткіші 13 пайызға төмендеген. Сонымен қатар аса ауыр қылмыстарды ашу деңгейі 100 пайызды құрап отыр. Жиында өзекті мәселелердің бірі ретінде интернет-алаяқтықпен күрес тақырыбы кеңінен қозғалды. Аталған құқық бұзушылықтардың саны 13 пайызға азайып (752-ден 654 дерекке дейін), дегенмен, бұл қылмыс түрі әлі де кең таралған санаттардың бірі болып қалып отыр. 2025 жылы өңірде кибералаяқтардың әрекеттерінен келген жалпы шығын 1,4 миллиард теңгеден асты. Соған қарамастан, полиция қызметкерлерінің жүйелі жұмысы мен заманауи құқықтық тетіктердің нәтижесінде жәбірленушілерге 526 миллион теңгеден астам қаражат қайтарылды. Өткен жылы полицейлер ондаған алаяқтық эпизодтарына қатысы бар екі ұйымдасқан қылмыстық топтың заңсыз қызметін тоқтатты. Қазіргі таңда полиция интернет-кеңістікті тұрақты бақылауда ұстап, жалған хабарландыруларды бұғаттау және тұрғындарды кең таралған алаяқтық схемалары туралы ақпараттандыру бағытында жүйелі жұмыс жүргізіп келеді. Қоғамдық қауіпсіздікті қамтамасыз ету мәселесіне де айрықша назар аударылуда. Өңірде бейнебақылау жүйесі қарқынды дамып келеді: бүгінде 47 мыңға жуық бейнекамера орнатылған, оның 14 мыңнан астамы жедел басқару орталығына қосылған. Бұл өз кезегінде қоғамдық орындардағы құқық бұзушылықтардың азаюына ықпал етуде. Мәселен, 2026 жылдың алғашқы екі айында мұндай қылмыстар саны 10 пайызға төмендеп, 70-тен 63 дерекке дейін қысқарған. Сонымен қатар есеп барысында жол қауіпсіздігін күшейту, есірткі қылмыстары мен мал ұрлығына қарсы күрес бағытындағы кешенді шаралар да кеңінен баяндалды. Кездесу соңында Абай Жүсіпов тұрғындардың сұрақтарына жауап берді. Азаматтардың басым бөлігі абаттандыру және жол инфрақұрылымына қатысты мәселелерді көтерді. Көпқабатты үйлердің мүлік иелері бірлестіктері мен пәтер иелері кооперативтерінің төрағалары бейнебақылау камераларын орнатуға қолдау көрсетуді сұрады. Қосымша зерделеуді қажет етпейтін барлық сұрақтарға толық әрі жан-жақты жауаптар берілді. Сондай-ақ құқықтық тәртіпті нығайтуға қосқан үлесі үшін БАҚ өкілдері мен қоғам белсенділері алғыс хаттармен марапатталды. Іс-шара соңында департамент басшысы азаматтарды жеке қабылдады.

Мемлекет басшысы Қасым-Жомарт Тоқаев Түркістан облысының жұртшылығымен кездесуде сөз сөйлеп, еліміздің келешегі — отаншыл, жасампаз, жауапкершілігі мол жастардың қолында екенін айтты, деп хабарлайды Ақорданың баспасөз қызметі.Президенттің сөзінше, Қазір Түркістан облысында 700 мыңға жуық жас азамат тұрады. Бұл — тұрғындардың үштен бірі деген сөз. — Киелі орданың тарихы қандай терең болса, болашағы да сондай жарқын болады деп сенімді түрде айтуға болады. Осы көп жас азаматтарымыз тұратын жерде тағы да мынадай сөзімді айтқым келеді: мен Президент ретінде еліміздің жастарына, олардың біліміне, қабілетіне, күш-қуатына зор үміт артамын. Елімізге жаны ашитын, яғни шын мәнінде жанашыр ұрпақ қана Қазақстанның көркеюіне мол үлес қоса алады. Еліміздің келешегі — отаншыл, жасампаз, жауапкершілігі мол жастардың қолында. Бұл да ақиқат десек, орынды болар. Нағыз отаншыл азамат дегеніміз, бұл — ең алдымен өз жұмысын адал орындап, адал еңбек етіп жатқан адам. Адал еңбекпен келген табыс берекелі болады. Жалқау, еріншек адам ешқашан отаншыл азамат бола алмайды. Қоғамымызға жалаң ұран, бос әңгіме, құрғақ уәде, қызыл сөз керек емес, нақты іс қажет. Отаншылдық дегеніміз әдемі сөз сөйлеп, жұрт алдында керемет болып көріну емес, бұл — ең алдымен елге пайда әкелу, Отанға деген адалдықты нақты іспен көрсету, — деді Мемлекет басшысы.

Мемлекет басшысы қазақстандықтарды Наурыз мейрамымен құттықтады. «Ең алдымен, баршаңызды Ұлыстың ұлы күні – әз-Наурыз мейрамымен шын жүректен құттықтаймын! Әз-Наурыз – тазару, жаңару уақыты. Тазалық – мән-мағынасы кең ұғым. Бұл – ең алдымен, ой тазалығы, сана мен ниет тазалығы деген сөз. Осыдан екі жыл бұрын елімізде «Таза Қазақстан» жалпыұлттық акциясы бастау алды. Ауқымды жоба халықтың, әсіресе, жастардың жаппай қолдауына ие болды. Азаматтарымыз тазалықты құр сөзбен емес, нақты ісімен көрсетуде. Ұқыптылық, жинақылық, тиянақтылық қасиеттері ұлтымыздың жаңа сапасына айнала бастады. Жалпы, «Таза Қазақстан» бастамасы – жай ғана кезекті саяси науқан немесе үгіт-насихат емес, бұл – мемлекетіміздің мызғымас идеологиясы. Сондықтан осы игі іспен біз жыл бойы айналысуымыз керек, бұл ұлт болмысының ажырамас бөлігі болуға тиіс. Әсіресе, Ұлыстың ұлы күні тазалық философиясын кеңінен дәріптеу маңызды. Ұлыстың ұлы күні Жер Ана да, еліміз де жаңарып жатқан осы тарихи сәтте айтылған тілектің мән-мағынасы айрықша деп ойлаймын. Сондықтан ең бастысы елімізге амандық, жерімізге тыныштық тілеймін. Қасиетті Отанымыз – Қазақстан Республикасы мәңгі жасасын!

Батыс Қазақстан облысының көпбейінді ауруханасының дәрігері Таубай Байжекенов Астанадан Оралға ұшып бара жатқан ұшақ бортында толғағы басталған жүкті әйелді құтқарып қалды. Астанадан Оралға ұшып бара жатқан ұшақта 27 апталық жүкті әйелдің толғағы басталған. Сол сәтте бортта болған дәрігер Таубай Байжекенов жедел көмек көрсетіп, баланы босандырып алды. Ұл бала аман-есен дүниеге келіп, ұшақ Астанаға шұғыл қонды. Ана мен баланың жағдайы тұрақты, олар жедел жәрдем қызметіне тапсырылды.

Наурыз мерекесіне орай Қазақстанда әуе рейстерінің саны артады. Азаматтық авиация комитетінің мәліметінше, наурыздың орта шенінен ай соңына дейін ел ішіндегі сұраныс жоғары бағыттар бойынша 146 қосымша рейс орындалады. Олардың басым бөлігі Алматы мен Астана қалалары арасында жоспарланған. Бұл бағытта 80 рейс қатынайды. Сонымен қатар, Алматы-Астана бағыты бойынша тағы 4 рейс қосылады. Шымкент-Астана және Ақтау-Астана бағыттары бойынша бір-бір қосымша рейс қарастырылған. Бұл шешім мереке күндері жолаушылар легін тиімді реттеуге бағытталған. ҚР КӨЛІК МИНИСТРЛІГІ АЗАМАТТЫҚ АВИАЦИЯ КОМИТЕТІНІҢ БАСПАСӨЗ ҚЫЗМЕТІ: Сонымен қатар, Алматы, Астана және Ақтау қалаларынан Ақтөбе, Шымкент, Түркістан, Қарағанды, Қостанай, Семей, Ақтау, Атырау, Өскемен және Орал қалаларына қосымша рейстер ұшады деген жоспар бар. SCAT әуе компаниясы өз кезегінде 19–21 наурыз аралығында Алматы – Астана бағыты бойынша 5 рейс, сондай-ақ Шымкент – Ақтау бағыты бойынша 1 рейс ашады.

Мемлекет басшысы Ресей Федерациясының Президентімен телефон арқылы сөйлесті. Әңгімелесу барысында Ресей Президенті Мемлекет басшысын Қазақстан Республикасының жаңа Конституциясын қабылдау бойынша жалпыұлттық референдумның табысты өтуімен құттықтады. Президенттер өзара қарым-қатынастың күн тәртібін талқылады. Қасым-Жомарт Тоқаев Ресей Президентінің мамыр айының соңында Қазақстанға жоспарлаған мемлекеттік сапары екі ел арасындағы стратегиялық серіктестік пен одақтастық байланыстарды нығайту тұрғысынан айрықша мәнге ие екенін атап өтті. Владимир Путин Астанада өтетін алдағы келіссөздерге берілген мұндай бағамен келісетінін жеткізіп, екіжақты ынтымақтастық барлық стратегиялық салада қарқын алғанына назар аударды.

Ұлттық қауіпсіздік комитетінің мәліметінше, 2026 жылдың басынан бері тергеп-тексерілген қылмыстық істер аясында 17 адам террористік және экстремистік қылмыстар жасағаны үшін әртүрлі мерзімге бас бостандығынан айырылды. Ведомство дерегіне сәйкес, сотталғандардың бірі – Алматы қаласының тұрғыны. Ол 2017 жылы шетелге кетіп, халықаралық террористік ұйымдар жағында ұрыс қимылдарына қатысқан. 2025 жылы шетелдік серіктестермен бірлескен операция барысында ұсталып, Қазақстанға жеткізілген. Сот оны 8 жылға бас бостандығынан айырды. Тағы бір іс бойынша Көкшетау қаласының тұрғыны жауапқа тартылды. Ол 2013 жылдан бері шетелде болып, интернет арқылы терроризм мен діни экстремизм идеяларын насихаттаған. ҰҚК мен шетелдік арнайы қызметтердің бірлескен іс-қимылы нәтижесінде ол ұсталып, елге жеткізілді. Сот шешімімен 9 жыл 6 айға сотталды. Сонымен қатар, Астана, Алматы, Шымкент қалаларында, сондай-ақ Ақмола және Ұлытау облыстарында террористік қылмысқа қатысы бар 6 діни радикал ұсталған. Бұдан бөлек, қылмыстық-атқару жүйесі мекемелерінде жазасын өтеп жатқан тағы 4 адамға қатысты жаңа айыптар тағылды. Олар сотталғандар арасында терроризмді насихаттап, діни алауыздықты қоздырды деген күдікке ілінген. Тергеу мәліметінше, күдіктілер интернетте және өз ортасында экстремистік материалдар таратып, өзге көзқарастағыларға қарсы күш қолдануға шақырған. Аталған фактілер бойынша Қылмыстық кодекстің 174 және 256-баптары негізінде сотқа дейінгі тергеп-тексеру жұмыстары жүргізілуде. Қылмыстық-процестік кодекстің талаптарына сәйкес өзге ақпарат жария етілмейді.

Қазақстан қор биржасындағы (KASE) күндік сауда қорытындысы бойынша доллардың салмақты орташа бағамы 482,33 теңге болды, осылайша 0,38 теңгеге қымбаттады. Қазақстан Ұлттық банкінің ресми доллар бағамы 20 наурызға 482,32 теңгені құрайды. Kurs.kz сайтының мәліметінше, қазіргі уақытта Алматыдағы айырбастау пунктерінде долларды сатып алу орташа бағамы – 480,6 теңге, сату – 483,06 теңге. Астанадағы айырбастау пунктерінде долларды орта есеппен 479,97 теңгеден сатып алады, 486,97 теңгеден сатады. Шымкенттегі айырбастау пунктерінде долларды орта есеппен 481,52 теңгеден сатып алады, 483,56 теңгеден сатады.

Астана жеңіл атлетикадан жабық кешендегі әлем чемпионатын өткізу орны болып таңдалды. Бұл туралы World Athletics кеңесінің Торунь қаласында өткен отырысында ресми түрде жарияланды. Әлем чемпионаты Қазақстан астанасында 2030 жылы 15-17 наурыз аралығында өтеді. Сондай-ақ халықаралық федерация басқа да әлем чемпионатының өтетін елдерін атады. Мәселен, 2028 жылы жабық кешендегі әлем чемпионаты Одиша өңірінде өтеді. Ал Қытайдың Хэфэй қаласында 2028 жылы спорттық жүрістен командалық әлем чемпионаты ұйымдастырылады. Айта кетейік, 2023 жылы Астанада жеңіл атлетикадан жабық кешендегі Азия чемпионаты өткен еді. Сондай-ақ елорда 2024 және 2025 жылдары World Indoor Tour Gold сериясының кезеңдерін қабылдады.

Мемлекет басшысы Қасым-Жомарт Тоқаевтың Ораза айт мерекесімен құттықтады. Бұл – бүкіл мұсылман қауымы үшін мән-маңызы ерекше, қасиетті мереке. Осы мейрамда рухани тазару мен парасаттылық, сабырлық пен қанағатшылдық, өзара сыйластық пен тілектестік, жанашырлық пен жақсылық құндылықтары дәріптеледі. "Отыз күн ораза тұтқан жұрт иманын байытып, кемелдікке ұмтылады. Төзімін шыңдап, төңірегіне қамқорлық танытады. Игі істерге ұйытқы болып, мұқтаж жандарға қол ұшын созады. Ата дәстүріміз бен асыл дініміз елдің бірлігін нығайтып, қоғамның берекесін арттыратын игі амалдар жасауға үндейді. Биыл Ораза айт мейрамы Наурыз мерекесімен қатар келіп, ел дамуындағы жаңа тарихи кезеңнің жаршысына айналды. Мұның символдық мәні зор. Қазақстан халқы Жаңа Ата заңды қабылдап, жарқын болашаққа, Әділеттілік пен Өркендеуге бастайтын жолды таңдады. Конституциялық реформаны жаппай қолдау арқылы ұлт тарихының жаңа парағын ашты. Баршаңызға зор денсаулық, бақ-береке, толайым табыс тілеймін! Еліміз аман, жеріміз тыныш болсын!”, – деді Президент.

Шымкент қаласындағы мектеп мұғалімдері арасында ұйымдастырылған «Кітап оқитын педагог» байқауының бірінші – мектеп ішілік іріктеу кезеңі аяқталды. 2026 жылғы 18 наурызда тест форматында өткен сынаққа қаладағы 5980 педагог қатысып, қазақ, орыс және әлем әдебиетінен таңдалған 15 шығарма бойынша білімдерін сынады. Жоба – Қазақстан Республикасы Президенті Қасым-Жомарт Тоқаевтың «Кітап оқитын ұлт» бастамасы аясында жүзеге асырылуда. Жоба 2025 жылдың қыркүйегінен бастап бірнеше өңірде, оның ішінде Шымкент қаласында пилоттық режимде іске қосылған. Негізгі мақсаты – қоғамның барлық топтарында тұрақты оқу әдетін қалыптастыру, сыни ойлау қабілетін дамыту және кітапты білім мен рухани байлықтың басты көзі ретінде дәріптеу. «Кітап оқитын педагог» бағыты мектеп ұстаздарынаарналған. Қатысушылар екі лигада – қазақ және орыс тілдерінде – сынға түсті. Онлайн-тест форматы барлық педагогқа тең мүмкіндік беріп, ашық бәсекеге жол ашты. Шымкент қаласының барлық бес ауданын қамтыған іріктеу кезеңіне қазақ лигасында 5169, орыс лигасында 811 ұстаз қатысты. Бұл көрсеткіш жобаның өңірдегі педагог қауымы арасында кеңінен қолдау тапқанын және кітап оқуға деген қызығушылықтың жоғары деңгейде екенін айқын дәлелдейді. Байқаудың алғашқы кезеңінен өткен үздік педагогтар дипломдар мен сертификаттарға ие болып, аудандық және қалалық кезеңдерге жолдама алды. Қатысушылардың басым бөлігі байқаудың тек білім деңгейін тексеріп қана қоймай, кәсіби өсуге, шығармашылық шабыт алуға және әріптестермен тәжірибе алмасуға зор серпін беретінін атап өтті. Осылайша, жоба ұстаздарды ортақ құндылық – кітап оқу мәдениеті төңірегінде топтастырып, жас ұрпақтың рухани дамуына үлес қосуда. «Бұл байқау маған кітап оқудың тек жеке даму үшін емес, оқушыларға үлгі болу үшін де қаншалықты маңызды екенін тағы бір рет сезіндірді.Жобаға қатысу арқылы өзімнің тарихи білімімді тереңдеттім әрі оқушыларға өткенді түсінудің жаңа жолдарын таптым. Жоба ұстаздарды біріктіріп, ортақ мақсатқа жетелейді – кітап оқитын ұрпақ тәрбиелеу», – дейді№138 мектебінің тарих пәні мұғалімі Ержан Алиев. «Онлайн-тест тапсыру процесі өте ыңғайлы болды, бірақ ең бастысы – шығармаларды оқу барысында алған шабыт. Ағылшын әдебиеті мен қазақ, орыс классикасын салыстыра отырып, әлемдік мәдениеттің байлығын сезіндім. Бұл жоба маған шет тілін оқытуда кітапты тиімді құрал ретінде пайдаланудың жаңа әдістерін ашты», – дейді№116 мектептің ағылшын тілі мұғалімі Алима Сегізбаева. «Байқау маған ұлттық әдебиетті тереңірек түсінуге және оқушыларға оны махаббатпен жеткізуге көмектесті. Кітап оқитын педагог – кітап оқитын ұлттың негізі. Осындай жобалар арқылы біз жас ұрпақтың рухани әлемін байыта аламыз», – дейдіҚазақ тілі мен әдебиет пәні мұғалімі Гаухар Сейтқұлова. «Жоба кәсіби өсуге ғана емес, әріптестермен тәжірибе алмасуға да серпін береді. Бұл – ұстаздар үшін шынайы шабыт көзі, өйткені кітап оқу – мәңгілік құндылық», – орыс тілі мен әдебиет пәні мұғалімі Екатерина Журавлева. Келесі кезеңдер 2026 жылдың сәуір айында өтеді, соның қорытындысы бойынша Шымкенттің ең үздік «Кітап оқитын педагогтері» анықталады. Жобаны «AMANAT» партиясының қолдауымен «Кітап оқитын ұлт – Читающая нация» қоғамдық қоры және Шымкент қаласы әкімдігі жүзеге асыруда. Өңірлік демеуші – «Азия Сервис».

«Ағайынды алтаумыз». Жуырда «Астана» арнасы көрермендер назарына жаңа сериал ұсынбақ. «Шымкент шоу» театрының ұжымы қолға алған жаңа туынды отбасылық құндылықты дәріптейді. Дастархан басына жиналған ағайындылар. Жарасбай ақсақал мен оның алты ұлы және келіндері. Жаңа туындыға «Шымкент шоу» театрының актерлары орындап жүрген «Ағайындылар» интермедиясы арқау болған. Бұл-соның толықтырылған нұсқасы. Бірінші ұсынысты негізі халықтың өзі тастады. Осыны неге «Күлпәш» сияқты сериал ғып түсірмейсіздер деп бірәзі сөйтіп жүргесін ой туындап, «Астана» каналына арнасына осындай ұсыныс айттық. Олар да ұсынысымызды бірден қабылдап, «Ағайынды алтаумыз» деп аталатын осы комедиялық өзіміздің қазақы менталитетке комедиялық сериал түсіріп жатырмыз. Туынды 16 сериядан тұрады. Әрқайсысының ұзақтығы- 40 минут. Әр бөлімі ағайындылардың проблемалары арқылы түрлі оқиғадан құралады. Жоба авторлары алты ағайын арқылы қоғамдағы ер азаматтардың тіршілігін қазақы әзілмен, қағытпа қалжыңмен шытырман оқиғалар арқылы көрсетуге тырысады. Сонымен қатар отбасы құндылығы, ағайын арасындағы сыйластық пен ауызбіршілік, үлкен мен кіші арасындағы қарым- қатынас кеңінен суреттеледі. Отбасылық құндылықтар, бауырлардың арасындағы ара қатынас. Үлкен глобальный проблемалар емес, орташа орташа проблемалар. Өйткені ең басты керегі бізге шынайылық болды да. Шынайылық болғандықтан ол жерде зритель өзін көру керек болды. Соған акцент беріп, соған сүйемелдеп алып келе жатырмыз қазір. Қазір түсірілім жұмыстары күні-түні жүруде. Көрерменге ұнайды деген ойдамыз дейді жоба продюсері. Мамыр айында барша көрерменге жол тартады. Көрерменнің көңілінен шығып, халыққа ұнайды деген ойдамыз. +Бізге қолдау білдіріп, қаржыландырып, сенім білдіріп отырған «Астана» телеарнасына алғысымыз шексіз. Сериал Шымкент қаласы аумағында түсіріліп жатыр. Идея авторлары бір жағы елдегі үшінші мегаполистің көрікті жерлерін көрсетіп, қонақжай шаһардың ішкі тіршілігін шартарапқа кеңінен таныта түсуді көздегендерін айтады.

Мемлекет басшысы Қасым-Жомарт Тоқаевтың төрағалығымен биыл 15 наурызда республикалық референдумда қабылданған Қазақстан Республикасының Конституциясын іске асыру мәселесі жөнінде жұмыс кеңесі өтті. Кеңеске Парламент Сенатының Төрағасы Мәулен Әшімбаев, Парламент Мәжілісінің Төрағасы Ерлан Қошанов, Премьер-министр Олжас Бектенов, Мемлекеттік кеңесші Ерлан Қарин, Президент Әкімшілігінің басшысы Айбек Дәдебай, Президенттің құқықтық мәселелер жөніндегі көмекшісі Ержан Жиенбаев және Әділет министрі Ерлан Сәрсембаев қатысты. Президент бүгін «2026 жылғы 15 наурызда қабылданған Қазақстан Республикасының Конституциясын іске асыру жөніндегі шаралар туралы» Жарлыққа қол қойғанын атап өтті. Мемлекет басшысы алда заңдар мен өзге де нормативтік-құқықтық актілердің ережелерін жаңа Конституцияға сәйкестендіру бойынша ауқымды жұмыс тұрғанын айтты. Қасым-Жомарт Тоқаев, ең алдымен, жаңа Конституцияға сәйкес билік институттарының қызметін айқындайтын заңдарды түзеу қажеттілігіне назар аударды. Жалпы, алты конституциялық заң және өзге заңнамалық актілерге өзгерістер мен толықтырулар енгізу жөнінде үш заң қабылдау қажет.Конституция күшіне енетін күнді ескере отырып, тиісті заңдарды Парламент сессиясы аяқталғанға дейін қабылдау керек. Мемлекет басшысы заңдарды сапалы әрі уақтылы әзірлеп, қабылдауды тапсырды. Сондай-ақ Үкімет заңға тәуелді нормативтік-құқықтық актілерді кешіктірмей түзеуге тиіс.

Шахбаз Шариф Қасым-Жомарт Тоқаевты Қазақстан Республикасының жаңа Конституциясын қабылдау бойынша республикалық референдумның табысты өтуімен құттықтады. Пәкістан Премьер-министрі мемлекеттік басқару жүйесі мен институционалдық орнықтылықты одан әрі нығайтуға және халықтың әл-ауқатын жақсартуға бағытталған бұл уақиғаның тарихи маңызын атап өтті. Шахбаз Шарифтің айтуынша, бүкілхалықтық дауыс беру нәтижесі Қазақстан азаматтары Қасым-Жомарт Тоқаевтың саяси және әлеуметтік-экономикалық реформаларын кеңінен қолдайтынын көрсетті. Мемлекет басшысы құттықтауы мен референдум қорытындысын жоғары бағалағаны үшін Пәкістан Премьер-министріне алғыс айтты. Қасым-Жомарт Тоқаев пен Шахбаз Шариф екі ел арасындағы стратегиялық серіктестіктің оң қарқынына көңілдері толатынын айтты. Осы орайда Президенттің биыл ақпан айында Пәкістанға жасаған мемлекеттік сапарының нәтижесінде қол жеткізілген уағдаластықтарды жүзеге асыру барысы талқыланды. Мемлекет басшысы мен Пәкістан Премьер-министрі өңірлік және халықаралық күн тәртібінің өзекті мәселелері жөнінде пікір алмасты.

Қазақстан қор биржасындағы (KASE) күндізгі сауда қорытындысы бойынша бір доллардың орташа өлшенген бағамы 479,02 теңгені құрап, 6,59 теңгеге төмендеді. Қазақстан Республикасы Ұлттық банкінің 17 наурызға арналған ресми долларының бағамы 486,2 теңге. Алматы қаласындағы айырбастау пункттерінде долларды сатып алу бағамы орта есеппен 479,25 теңге, сату – 482,09 теңге. Астана қаласында долларды орта есеппен 476,1 теңгеден сатып алып, 483,1 теңгеден сатуда. Шымкент қаласында долларды орта есеппен 479,97 теңгеден сатып алып, 482,12 теңгеден сатуда.

Референдум күні аумақтық комиссияларға 35 өтініш түсті. Ал дауыс беру қорытындысы бойынша екі талап-арыз сотқа жолданды. Оның бірі Ақтөбе облысындағы сайлау учаскесінде Брайль қарпімен жазылған бюллетеньнің оқылмауына қатысты болса, екіншісі Астана қаласындағы учаскеде байқаушыны шығару туралы учаскелік комиссия шешіміне шағымдануға байланысты болды. Алайда Орталық референдум комиссиясының мүшесі Әсел Жанабилованың мәлімдеуінше, талапкерлердің уәждері расталған жоқ. Аумақтық сайлау комиссияларының дерегіне сәйкес, дауыс беру күні барлығы 35 өтініш келіп түскен. Оның ішінде 11-і Астанада, 6-ы Алматыда, 4-еуі Маңғыстау облысында, ал 3-тен Шымкент қаласында, Қызылорда және Абай облыстарында тіркелген. Жанабилованың айтуынша, барлық өтініштер заңнаманы түсіндіру, референдумның мәні мен ұйымдастырылуы, сондай-ақ учаскелік комиссиялардың жұмысы мен шетелдегі дауыс беру мәселелеріне қатысты болған. Дауыс беру қорытындысы бойынша сот органдарына екі талап-арыз берілді. Бірінші талап-арыз Ақтөбе облысындағы Брайль трафаретінің оқылмауына қатысты болды. Екіншісі – Астана қаласындағы учаскеде байқаушыны шығару туралы учаскелік комиссия шешіміне шағымдануға байланысты. Аталған талап-арыздарды қарау нәтижесінде талапкерлердің уәждері расталмады, осыған байланысты соттар оларды қанағаттандырудан бас тартты, – дейді Әсел Жанәбілова.

Ақордада өткен іс-шараға Премьер-министр Олжас Бектенов, Парламент Сенатының Төрағасы Мәулен Әшімбаев, Парламент Мәжілісінің Төрағасы Ерлан Қошанов, Мемлекеттік кеңесші Ерлан Қарин, Президент Әкімшілігінің басшысы Айбек Дәдебай, Үкімет мүшелері, орталық мемлекеттік органдардың жетекшілері, облыс, Астана, Алматы және Шымкент қалаларының әкімдері, сондай-ақ Конституциялық комиссия мен Жалпыұлттық коалиция мүшелері қатысты. Орталық референдум комиссиясының төрағасы Нұрлан Әбдіров жаңа Конституция жобасы бойынша республикалық референдумның қорытындысын жариялады.