**Президент Қасым-Жомарт Тоқаевтың Өзбекстанға жұмыс сапары аяқталды** 🇰🇿🇺🇿Мемлекет басшысын Бұхара қаласының әуежайынан Өзбекстан Президенті Шавкат Мирзиёев шығарып салды.

**Қытай 2030 жылға қарай Айға адам ұшырмақ** Адамзаттың Айға ұшу миссиясы сәтті аяқталды. «Артемида II» экипажы мінген капсула Тынық мұхитына қонып, 50 жылдан кейін Айды айналып қайтқан алғашқы сапар ретінде тарихқа енді. Миссия барысында түсірілген Жердің Ай жиегінен көрінісі мен Күн тұтылуы әлем назарын аударды. Алайда бұл жетістіктің артында ғарыш саласындағы экономикалық және саяси бәсеке күшейіп келеді. Алдағы жылдары АҚШ пен Қытай арасында Айды игеру бойынша бәсеке күшейе түспек. Қазіргі басты мақсат - Айдың оңтүстік полюсі. Мұнда су қоры болуы мүмкін. Бұл болашақ ғарыш базалары мен Марсқа ұшатын миссиялар үшін стратегиялық ресурс саналады. **__Толығырақ «Әлем және біз» бағдарламасынан көріңіз. Толық нұсқасы __**[Qazaqstan TV YouTube ](https://youtu.be/IrS43P87-ts)**__арнасында.__**

🇰🇿🇺🇿**Қазақстан мен Өзбекстан президенттері Бұхараның тарихи орындарын аралап көрді ** Қасым-Жомарт Тоқаев пен Шавкат Мирзиёев IV-III ғасырларда бой көтерген Арк қамалын тамашалады. Көне нысан сан рет қирағанымен қайта қалпына келтірілген. Қазіргі уақытта бекініс аумағында Бұхара мемлекеттік музей-қорығы орналасқан. Бұдан кейін мемлекеттер басшылары Бұхарадағы танымал орындардың бірі «Ляби-хауз» кешеніне барды. Мұнда XVII ғасырда салынған Нәдір Диуан-Бегі медресесі мен ханакасы, XVI ғасырда іргетасы қаланған Көкілташ медресесі секілді әйгілі сәулет ескерткіштерін көре аласыз. Қазақстан мен Өзбекстан көшбасшылары XII-XVI ғасырларда салынған Калян мұнарасы мен мешіті, Мири Араб медресесі секілді үш ғимараттан тұратын «Пои-Калян» тарихи кешенінде болды. Жергілікті медреселерде қазақтың Мәшһүр Жүсіп Көпейұлы, Нұржан Наушабаев, Шортанбай Қанайұлы және басқа да көрнекті қайраткерлері білім нәрімен сусындаған. Олардың есімдері екі ел тарихына ортақ. Бұдан бөлек, мемлекеттер басшыларына Мәшһүр Жүсіп Көпейұлының музей-құжырасы таныстырылды. Президенттер Бұхарада оқыған қазақ зиялылары туралы көрмені аралап көрді.

🇰🇿🇺🇿**Қазақстан мен Өзбекстан президенттері MERGANTEKS кәсіпорнына барды** Қасым-Жомарт Тоқаев пен Шавкат Мирзиёев MERGANTEKS мақта-мата кластерінің қызметімен танысты. Мұнда шикізатты өңдеуден бастап, одан дайын текстиль өнімдерін шығаруға дейінгі толық өндіріс циклі жолға қойылған. Кластердің өндірістік құрылымына мақта зауыты, екі жіп иіру фабрикасы, тоқыма және бояу цехтары, тігін фабрикасы кіреді. Өнім Польша, Түркия, Израиль, Босния және Герцеговина, Иран, сондай-ақ басқа да мемлекеттерге жеткізіледі.

**Соңғы бір жылда 41 366 адамды ит қапқан ** Жергілікті атқарушы органдардың мәліметіне сәйкес, бір жыл ішінде 41 366 адамды ит қапқан. Оның ішінде 23 134 адам бұралқы иттердің шабуылынан зардап шеккен. Ал Мәжіліс депутаты Нұргүл Тау бұл мәселені экономикалық тұрғыдан бағалады. «Бір итті стерилизациялау - 24 010 теңге, кастрациялау - 17 244 теңге, вакцинациялау - 7 713 теңге, эвтаназия - 11 571 теңге. Иттерді тәуліктік күтіп-бағу құны 5 885 теңгені құрайды. Яғни бір итке жұмсалатын жалпы шығын орта есеппен 74 000 теңгеге жетеді», - дейді ол. __«Қос палата» бағдарламасының толық нұсқасын __[«Qazaqstan TV YouTube»](https://youtu.be/6a8UCc3PHdg)__ арнасынан көріңіздер.__

🇰🇿🇺🇿**Қазақстан мен Өзбекстан президенттері жасанды интеллект хакатонына барды** Қасым-Жомарт Тоқаев пен Шавкат Мирзиёев Бұхарада Жасанды интеллект бойынша өтіп жатқан жалпыұлттық хакатонды тамашалады. Хакатон білім беру мекемелері, бизнес және мемлекеттік құрылымдар арасындағы ынтымақтастықты нығайтуға септігін тигізеді. Хакатонға қатысушылар медицина, білім беру технологиялары, сондай-ақ кәсіпкерлік бағыттарындағы нақты міндеттердің түйінін тарқатумен айналысады. Президенттерге Govtech Өзбекстан цифрлық үкіметінің соңғы әзірлемелері, көлік, кеден, салық, энергетика, денсаулық сақтау, әлеуметтік қорғау, құрылыс, өнеркәсіп салаларындағы цифрлық шешімдер таныстырылды.

**Шавкат Мирзиёев Қасым-Жомарт Тоқаевқа бірқатар тарихи құжатты тапсырды ** Бұхарадағы бейресми кездесу барысында Өзбекстан Президенті Мемлекет басшысына архив материалдарын табыстады. Атап айтқанда, Қазақстан тарапына Түркістандағы Қожа Ахмет Ясауи және Рәбия Сұлтан бегім кесенелеріне қатысты 1920-1950 жылдары Өзбекстанда табылған құнды құжаттар, сызбалар және фотосуреттер берілді. Бұл құжаттардың көбі бүгінге дейін ғылыми айналымға түспеген және тарихи-мәдени құндылығы зор.

**Қазақстан мен Өзбекстан мемлекеттерінің басшылары Бұхарадағы Ахуалдық орталыққа барды ** Президенттер Қасым-Жомарт Тоқаев пен Шавкат Мирзиёев Бұхара облысының жаңа Ахуалдық орталығының қызметімен танысты. Онда тәулік бойы өңірдегі ахуалға, соның ішінде инфрақұрылым жағдайына, тұрғын үй-коммуналдық шаруашылығына, көлік жүйесіне, қауіпсіздік қызметіне және табиғи процестерге бақылау жүргізіледі. Ахуалдық орталық төтенше оқиғалар кезінде шұғыл қызметтердің іс-қимылын үйлестіріп, ықтимал сын-қатерлерге тосқауыл қою үшін жағдайдың өрбуін модельдеуді жүзеге асырады.

🇺🇿Өзбекстан Президенті Бұхарадағы бүгінгі жүздесудің екі ел арасындағы сан қырлы байланыстарды кеңейтуде маңызы зор деп пайымдайды – Сіздің бұл сапарыңыз ғасырлардан тамыр тартатын қос халық арасындағы достықты, тығыз бауырластықты көрсетеді, сондай-ақ стратегиялық серіктестік пен одақтастық қарым-қатынастың ұдайы нығайып келе жатқанына дәлел. Ашық әрі риясыз келіссөздер ынтымақтастығымыздың мазмұнын байыта түсіп, нақты нәтижелерге қол жеткізуге, өңірдегі өзара ықпалдастық аясын одан әрі кеңейтуге негіз болатынына сенімдімін, – деді Шавкат Мирзиёев. ▫️Ол өзбек халқының ең жақын көрші және одақтас ретінде Қасым-Жомарт Тоқаевтың Әділетті Қазақстан құру жолындағы тиімді реформаларына шынайы қолдау білдіретінін жеткізді. – Әлемдегі күрделі ахуалға қарамастан, еліңіздің экономика көлемі 300 миллиард доллардан асты. Шикізаттық емес сектор жанданып, ішкі жалпы өнімде шағын және орта кәсіпкерліктің үлес салмағы 40 пайызға жуықтады. Сіз мемлекетті цифрландыру ісіне ерекше мән бересіз. Биыл Қазақстанда Цифрландыру және жасанды интеллект жылы деп жарияладыңыз. Еліңіздің жаһандық кеңістіктегі абыройы артып келеді. Сіздің басшылығыңызбен Қазақстан халқының мүддесіне негізделген көпвекторлы сыртқы саясат табысты жүзеге асырылып жатыр. Сіз көтерген халықаралық бастамалар кеңінен қолдау тауып отыр. Бұл Сіздің аймақтық және әлемдік проблемаларды шешу ісіндегі көрнекті саяси қайраткер екеніңізді көрсетеді. National Interest басылымына жарияланған мақалаңызды ерекше ықыласпен оқыдым. Қазіргі халықаралық ахуалда прагматизмнің, ашықтықтың және шынайылықтың рөлі артты деген ойыңызбен толық келісемін. Экономикалық жаңғыру мәселесіне терең үңілетініңізді атап өткім келеді. Инвестиция мен орнықты даму реформаларын ұштастыруды жекелеген бастама ретінде қарастырмай, тұтас стратегияға айналдырдыңыз. Мұны ерекше бағалаймын. Біз Сіздің бауырлас халықтар арасындағы тату көршілік қарым-қатынасты, стратегиялық серіктестік пен одақтастықты нығайтуға қосқан үлесіңізді айрықша қадірлейміз, – деді Өзбекстан Президенті. ▫️Кездесуде тараптар экономикалық серіктестікті кеңейту жөніндегі стратегиялық бағытты ұстанатынын растады. ▫️Сауда мен өндіріс салаларында нақты көрсеткіштерге қол жеткізу үшін екі ел үкіметтерінің ықпалдастығын арттыру туралы келісім жасалды. Іскер ортаны жүйелі түрде қолдау мен ынталандырудың маңызы атап өтілді. ▫️Мемлекеттер басшылары сирек кездесетін металдарды өндіру мен өңдеу, көлік-транзит, су-энергетика салалары және ІТ секторындағы ықпалдастық мәселелерін егжей-тегжейлі талқылады. ▫️Сондай-ақ мәдени-гуманитарлық байланыстарды нығайту мен туризмді дамыту ісіне айрықша мән берілді. ❗️Келіссөз қорытындысы бойынша президенттер екі ел үкіметтері арасындағы Сауда-экономикалық ынтымақтастықты одан әрі дамыту жөніндегі жол картасын қабылдауға уағдаласты.

✅**Мемлекет басшысы Өзбекстан Президентінің «Таза ауа» бастамасына қолдау білдіріп, бұл жоба Қазақстанның ірі қалалары үшін де өзекті екеніне тоқталды ** – Сіздің таза ауаға қатысты бастамаңызды құптаймын. Ташкенттегі экологиялық жағдайға алаңдаушылық білдіруіңізді түсінемін. Біздің Алматы қаласындағы ахуал да тым күрделі. Өкінішке қарай, Алматы әлемдегі ауасы ластанған ірі қалалар қатарында тұр. Сондықтан шұғыл шаралар қабылдау қажет. Егер Сіз қарсы болмасаңыз, «Таза ауа» бастамасын бірлесіп іске асыруды ұсынамыз. Президенттер ұйытқы болған бұл жобаны үкіметтеріміз жүзеге асырады. Жұртшылық пен халықаралық қоғамдастық мұны қуаттайды деп санаймын. Шын мәнінде, бұл бастама аясында көп іс атқаруға болады. Осы арқылы жергілікті билік пен кәсіпкерлер экологияны қорғауда, табиғатты аялауда жауапкершілік жүгін жете сезінеді, – деді Қасым-Жомарт Тоқаев.

🔹**Президент тарихи тығыз байланыстар Қазақстан мен Өзбекстан арасындағы шынайы стратегиялық серіктестік пен одақтастықтың мызғымас іргетасы екенін еске салды** Екіжақты қарым-қатынасымыздың бұрын-соңды болмаған жоғары деңгейге көтерілуіне, құрметті Шавкат Миромонович, Сіздің қосқан үлесіңіз зор. Қазақстан ең жақын көрші әрі одақтас ел ретінде Сіздің парасатты басшылығыңызбен жүргізіліп жатқан ауқымды саяси және экономикалық өзгерістерді толық қолдайды. Өзіңіз белгілеген стратегиялық бағдар арқылы халқыңыздың әл-ауқаты ұдайы жақсарып, ірі инфрақұрылымдық және әлеуметтік жобалар іске асырылуда. Бұл жетекші қаржы институттарының рейтингінде оң бағаланып, еліңіздің халықаралық аренадағы беделі артып келеді. Сіздің ұлттық мүддені көздейтін дәйекті саясатыңыз Өзбекстанның, сондай-ақ тұтас аймақтың одан әрі өсіп-өркендеуіне ықпал етеді деп сенемін, – деді Қасым-Жомарт Тоқаев. ☑️Мемлекет басшысы Қазақстанда жаңа Конституция қабылдануына байланысты Өзбекстан көшбасшысының құттықтау жолдағанына алғыс айтты. Президент осы тарихи оқиға кезінде шет мемлекеттер басшылары арасынан Шавкат Мирзиёев алғашқы болып құттықтағанын жеткізді.

🇰🇿🇺🇿**Мемлекет басшысы Қасым-Жомарт Тоқаев Өзбекстан Президенті Шавкат Мирзиёевпен бейресми кездесу өткізді** Қасым-Жомарт Тоқаев Президент Шавкат Мирзиёевке қонақжайлықпен қарсы алып, бүгінгі бейресми кездесуді ұйымдастырғаны үшін ризашылығын білдірді. «Шын мәнінде, қазіргі геосаяси құбылмалы жағдайды ескерсек, бұл сапарымды өте маңызды деп айтсақ, қате болмас. Өзбек елі – Қазақстан үшін сенімді стратегиялық серіктес. Біз осы сапар барысында өзекті мәселелер жөнінде пікір алмасамыз. Күн тәртібінде екіжақты қарым-қатынасымыз бойынша бірқатар аса маңызды мәселе бар. Алайда біздің арамызда ешқандай түсінбеушілік, иә болмаса кедергі жоқ. Қол қойылған жобалар, жоспарлар бірте-бірте орындалуда. Біздің Үкімет барлық келісімдерді бұлжытпай іске асыру міндетін жақсы түсініп отыр. Менің бақылауыммен тиісті жұмысты атқарып жатыр», – деді Мемлекет басшысы.

**❓Балабақшаны ваучерлік қаржыландыру деген не?** Ваучерлік жүйе балабақша кезегін азайтуға әсере ете ме? Бүгінде қанша бала кезекте тұр? 📺Осы және өзге де өзекті мәселелер жексенбі 20:00-де «Апта» бағдарламасында.

🇰🇿🇺🇿**Қасым-Жомарт Тоқаев пен Шавкат Мирзиёев Бахауддин Нақышбанди мемориалдық кешеніне барды** ✔️Қазақстан Президентінің Өзбекстанға жұмыс сапары Бұхарадағы Бахауддин Нақышбанди кесенесіне зиярат етуден басталды. ✔️Мемлекеттер басшылары медресе, екі мешіт пен мұнарадан тұратын мемориалдық кешенді аралап көрді. Зиярат барысында Құран оқылып, бауырлас халықтарға бейбіт өмір мен бақ-береке тілеп, дұға жасалды. ✔️Қасым-Жомарт Тоқаев пен Шавкат Мирзиёев мемориалдық кешенге келушілермен жылы рәуіште әңгімелесіп, суретке түсті. ✔️Нақышбандия тариқатының негізін салушы Бахауддиин Нақышбандидің кесенесі XVI ғасырда салынған. ✔️Ескерткіш жанындағы музейде XIX ғасырдағы Құран қолжазбасы, тарихи құжаттар, кітаптар мен басқа да құнды жәдігерлер сақталған.

**🇰🇿🇺🇿Мемлекет басшысы Қасым-Жомарт Тоқаев Өзбекстанға жұмыс сапарымен барды** Бұхара қаласының әуежайында мәртебелі мейманды Өзбекстан Президенті **Шавкат Мирзиёев** қарсы алды. Салтанатты қарсы алу рәсімінде Қазақстан Президентінің құрметіне ұлттық ән мен би орындалды. Бүгін мемлекеттер басшылары бейресми кездесу өткізіп, шаһардағы бірқатар тарихи және өнеркәсіп нысанын аралайды.

🔹**Бұхарадағы бейресми кездесуге өзбек халқының дайындығы жоғары деңгейде** Бұхара – Өзбекстанның ірі өнеркәсіп және мәдени орталығы. Қасым-Жомарт Тоқаев пен Шавкат Мирзиёев бүгін дәл осы көне шаһарда бейресми кездесу өткізеді. 🇰🇿🇺🇿Мемлекет басшылары екі ел арасындағы серіктестік пен достық байланысты одан әрі нығайта түспек. 🎞«Ақорда» бағдарламасының түсірілім тобы Өзбекстаннан хабар таратады. Бағдарлама ертең 🕰17:40-та «Qazaqstan» телеарнасында көрсетіледі.

**🚀«Артемида II» миссиясы: Айға ұшқан экипаж Сан-Диего жағалауы маңында суға қонды** NASA ресми сайтының хабарлауынша, бүгін, яғни 11 сәуір күні «Орион» ғарыш кемесінің экипажы отырған капсула АҚШ-тың Калифорния штатындағы Сан-Диего жағалауына жақын Тынық мұхитына қонған. Оларды сол жерде АҚШ Әскери-теңіз күштерінің USS John P. десанттық кемесі күтіп алған. 🌙Экипаждың Айға бағытталған сапары 1 сәуір күні басталды. 10 күнге созылған миссия барысында NASA ғарышкерлері Рид Уайсмен, Виктор Гловер және Кристина Кук, сондай-ақ Канаданың ғарыш агенттігінің ғарышкері Джереми Хансен Айға жетіп, жерден ең алыс қашықтыққа ұшу бойынша рекорд орнатқан. Сондай-ақ бірқатар ғылыми тәжірибелер жүргізіп, аман-есен Жерге оралған. Бұл - Айға бағытталған 54 жылдан кейінгі сәтті аяқталған миссия. Бұған дейін 1972 жылы Apollo 17 Moon landing миссиясы жүзеге асырылған. 📌«Артемида-2» миссиясы АҚШ-тың басты ай бағдарламасындағы шешуші қадамы болып отыр. Мұндағы басты мақсат – бағдарлама негізінде 2028 жылы «Артемида-4» миссиясын жүзеге асыру арқылы Ай бетіне алғаш рет адам қондыру.

📉Қазақстанда қылмыс деңгейі 9 пайызға төмендеген Елімізде өткен жылдың осы кезеңімен салыстырғанда қылмыс деңгейі 9%-ға, яғни 2150 қылмысқа азайған. Қылмыстың төмендеуі барлық негізгі санаттар бойынша байқалған. Сонымен қатар барлық санаттағы қылмыстардың ашылу деңгейі артқан. Бұл туралы Ішкі істер министрлігінде өткен кеңейтілген алқа отырысында айтылды. ✅Бұрын сотты болғандармен, кәмелетке толмағандармен, мас күйінде қоғамдық орындарда және тұрмыста жасалатын құқықбұзушылықтар саны төмендеген. ✅Интернет-алаяқтық фактілері азайып, қылмыстың бұл түрі бойынша ашылу көрсеткіші артқан. Аккаунттарды бұзу, криптовалюталар, онлайн-қарыздар және жалған интернет-ресурстарға байланысты алаяқтықтар саны қысқарған. ✅3,6 млн-нан астам әкімшілік құқықбұзушылықтың жолы кесіліп, бұл олардың ауыр қылмыстарға ұласуының алдын алуға мүмкіндік берген. ✅«Таза Қазақстан» қағидаты аясында 722 мыңнан астам құқықбұзушылық анықталып, 3 мыңнан астам заңсыз қоқыс орындары жойылған. ✅Жол қауіпсіздігі саласында 3 млн-нан астам жол қозғалысы ережелерін бұзу фактісі тоқтатылып, бұл жол-көлік оқиғаларында қаза тапқандар мен жарақат алғандардың санын азайтуға ықпал еткен.

**🎖️Мемлекет басшысы белгілі ғалымдарды марапаттады ** ✍️ Қасым-Жомарт Тоқаев шығыстану ғылымына қосқан елеулі үлестері және филология саласының қытайтану бағытын терең зерделеп, қазақ тарихына қатысты тың деректерді жинақтауға, мәдени құндылықтарымызды насихаттауға, екі ел арасындағы тарихи байланысты нығайтуға сіңірген айрықша еңбектері үшін Р. Сүлейменов атындағы Шығыстану институтының бас директоры, филология ғылымдарының докторы, профессор Дүкен Мәсімханұлына ІІІ дәрежелі «Барыс» орденін, сондай-ақ ғалым, филолог Айнұр Әбиденқызына «Қазақстанның еңбек сіңірген қайраткері» құрметті атағын беру туралы жарлықтарға қол қойды. Осы орайда Президент ғалымдарға құттықтау жеделхатын жолдап, бұл марапат олардың ұзақ жылғы іргелі ізденістері мен табанды еңбектерінің нәтижесі екенін атап өтті. 💐Мемлекет басшысы белгілі шығыстанушылардың отбасына бақ-береке және шығармашылық табыс тіледі.

**📩Қазақстандықтардың экологиялық мәселе туралы өтінімдері Telegram-бот арқылы үздіксіз қабылдануда ** Экология және табиғи ресурстар министрлігінің хабарлауынша, «Таза Қазақстан» акциясы аясында @TazaQazBot Telegram чат-боты өз жұмысын жалғастыруда. Бұл - тұрғындарға экология және абаттандыру саласындағы мәселелер туралы тікелей хабарлауға мүмкіндік беретін ыңғайлы цифрлық сервис. ✔️Өтінім жолдау үшін Telegram қосымшасында чат-ботқа кіріп, авторизациядан өтіп, мәселенің фотосын тіркеп, нақты мекенжайын, қысқаша сипаттама қалдыру жеткілікті. Өтінім автоматты түрде тиісті органдарға жолданады. Сондай-ақ платформа арқылы пайдаланушы өтінімнің орындалу мәртебесін бақылай алады.